قصتي
البداية من الفرع
بعد الثانوية العامة على طول اشتغلت في شركة نيو بورن للملابس الجاهزة، وكانت فروعها اسمها Fifty Five، سيلز في فرع طنطا.
8 شهور ووصلت لمدير فرع
بعد 6 شهور بقيت نائب مدير الفرع، وبعدها بشهرين بقيت مدير الفرع.
مدير منطقة — 5 فروع
مسكت 5 فروع: الجرد والمبيعات وشؤون الموظفين، وكل اللي يمشّي الفروع دي.
شوز كلوب
دخل شركاء جداد واسم المجموعة بقى شوز كلوب. مسكت المخازن 3 شهور، ورجعت تاني لإدارة الفروع، بس المرة دي الفروع كلها.
من البيع للإدارة
تركيزي اتنقل من المبيعات للجرد والشغل الإداري، وبعدها قعدت شهرين في قسم الحسابات.
سنتين في الأونلاين
مسكت البيع الأونلاين للمجموعة — صفحة الفيسبوك وجوميا وسوق ونون — وقعدت فيه حوالي سنتين. ده كان أنجح حاجة عملتها هناك، وكده أكون اشتغلت في كل أقسام الشركة.
أسّسنا شركة من الصفر
الشركاء انفصلوا والشركة اتقسمت، فطلعت مع واحد من الشركاء نأسس التجار العرب — المخزنجي وبابا التوفير. ماكانش فيه سيستم، فعملت سيستم إداري كامل على Excel بـVBA والفورمز، ورفعته على Drive، وكان شايل كل حركات المخازن والفروع، وكنت ماسك عليه الإدارة والحسابات.
ضابط احتياط
دخلت الجيش ضابط احتياط. أول 6 شهور في كلية ضباط الاحتياط كانت تدريب بس، وبعد ما رحت الوحدة رجعت أشتغل أونلاين: أتابع السيستم اللي عملته وأحلل البيانات، لحد ما خلّصت الجيش.
مدير التشغيل
رجعت الشركة في أكتوبر 2021 مدير تشغيل. كانت المجموعة كبرت ووصلت 35 فرع وفيها عشوائية كتير، فعملنا هيكلة للشركة ونقلنا الشغل كله على سيستم Miracle ERP.
بداية أودوو
احتجنا حاجة أكبر من إمكانيات السيستم ده. اتعلمت أودوو، وعملت سيستم المجموعة بنفسي من الألف للياء، ودربت الموظفين عليه، ومن هنا بدأت رحلتي مع أودوو.
ترابُط
اتعرفت على صاحب شركة ترابُط وبدأت معاه في الدعم الفني. وفي يناير 2023 بقيت مدير المشاريع في الشركة، بدرّب الاستشاريين الجداد، وخدت شهادة أودوو، وخلّصت كل كورسات أودوو الرسمية بالدرجة النهائية، وسلّمت مشاريع في قطاعات كتير.
استشارات جنب شغلي
شغل استشاري 6 شهور مع شركة 99.99 لتجارة الأحذية عشان أطوّر شغلها، جنب شغلي في التجار العرب.
ليسانس الحقوق
ده كله كان وأنا بدرس في الكلية. اتخرجت من كلية الحقوق جامعة طنطا بتقدير جيد، وأنا شغال شغل كامل طول سنين الدراسة.
التطوير بالذكاء الاصطناعي
طريقة بنائي للأنظمة اتغيرت تاني. بقيت بعمل الموديولات الخاصة والأتمتة ومميزات الذكاء الاصطناعي جوه أنظمة العملاء بأدوات الذكاء الاصطناعي — شغل كان محتاج فريق مبرمجين، بيعمله استشاري واحد فاهم الشغل اللي وراه. ده اتجاه المجال، وأنا عايز أكون من الأوائل فيه.
3 أماكن
شريك في ترابُط، ومدير تشغيل في المخزنجي، ومدير تشغيل في شركة البيت العالي للعقارات — استشارات وأودوو وتشغيل في نفس الأسبوع.
